2016 წლის 28 სექტემბრიდან 1 ოქტომბრამდე, ლას ვეგასში (ნევადა, აშშ), გაიმართა თმის აღდგენითი ქირურგიის საერთაშორისო საზოგადოების (ISHRS) XXIV ყოველწლიური კონგრესი. ამ კონგრესზე დარეგისტრირებული იყო წინა კონგრესებთან შედარებით რეკორდული რაოდენობის დელეგატი. 24-ე კონგრესი გამორჩეული იყო თავისი შინაარსითაც და იმ აქცენტებით რომლებიც გაკეთდა თმის გადანერგვის მიმართულებით. თუ აქამდე ექიმთა – ტრანსპლანტოლოგთა გარკვეული ჯგუფი თავს იწონებდა მაშტაბური თმის გადანერგვებით (5000, 6000, და ა.შ. გრაფტი ერთი ოპერაციის ფარგლებში), ნაწილი კი უპირატესობას ანიჭებდა მხოლოდ FUE (ე.წ. უნაკერო) მეთოდს, კონგრესის მსვლელობისას გამოიკვეთა საერთო აზრი, რომ უნდა ვიყოთ შედეგზე ორიენტირებული და არა ერთმანეთთან შეჯიბრზე, თუ ვინ უფრო მეტ თმას გადანერგავს. მხოლოდ სწორად დაგეგმილი ოპერაცია იძლევა საუკეთესო შედეგს. ყველა კონკრეტულ შემთხვევაში უნდა განისაზღვროს გადასანერგი გრაფტების ის ოპტიმალური რაოდენობა და გადანერგვის ის მეთოდი, რომელიც ნაკლებ ზიანს მიაყენებს პაციენტს და მოგვცემს თმის მაქსიმალურ ზრდას. მაღალი ხარისხის გამელოტების დროს (V-VI-VII) კი რეკომენდებულია თმის აღდგენა რამდენიმე ოპერაციის ფარგლებში (მინიმუმ 2 და არა ერთ ეტაპად). კონგრესის მუშაობაში აქტიურად მონაწილეობდნენ პროფესორი ალექსი მახარაშვილი და პლასტიკური ქირურგი, მედიცინის დოქტორი დეა პაპასკირი. საინტერესო იყო ალექსი მახარაშვილის დისკუსია მრგვალ მაგიდასთან, ექსპერტებთან კრისტიან ბისანგასთან (Christian N. Bisanga) და პატრიკ მვამბასთან (Patrick Mwamba). ალექსი მახარაშვილმა გამოთქვა თავისი მოსაზრება, თუ როგორ უნდა შევამციროთ გრაფტების (თმის ფოლიკულების) დაზიანება FUE მეთოდის გამოყენების დროს. პატრიკ მვამბამ კი გაგვიზიარა თავისი გამოცდილება ხვეული თმის FUE მეთოდით ექსტრაქციის შესახებ. ჩვენთვის ლას ვეგასის კონგრესი დასამახსოვრებელი იყო იმით რომ აქ პირველად გაჟღერდა მოხსენება გრძელი თმის FUE მეთოდით გადანერგვის შესახებ. მისი ავტორი იყო ბრაზილიელი ექიმი Otavio Boaventura Lima. სამწუხაროა რომ სწორედ ის დაფიქსირდა ამ მეთოდის ნოვატორად, რადგან პროფესორმა ალექსი მახარაშვილმა 2014-2015 წლებში შეიმუშავა გრძელი თმის გადანერგვის ტექნოლოგია FUE (უნაკერო) მეთოდით, მაგრამ სანამ ინჟინრები მუშაობდნენ შესაბამისი აპარატურისა და ინსტრუმენტების შექმნაზე, ISHRS-ის 24-ე საერთაშორისო კონგრესზე ლას-ვეგასში, ბრაზილიელმა ექიმმა პირველმა მოახსენა ზუსტად ანალოგიური მეთოდის შესახებ. აღმოჩნდა რომ ის და ალექსი მახარაშვილი ერთდოულად ფიქრობდნენ ამ საკითხზე, ამიტომ გრძელი თმის გადანერგვას FUE მეთოდით თამამად შეგვიძლია ვუწოდოთ ბოავენტურა-მახარაშვილის მეთოდი.